O alcalde de Vigo, Abel Caballero, expresou este martes a súa sorpresa polas demandas do grupo municipal popular e o anuncio dunha moción para instar o Goberno a levar adiante diversos proxectos, e afeou ao PP que demande de Pedro Sánchez cuestións que Rajoy tivo “paralizadas durante anos”, sobre todo agora que “están todas desbloqueadas”.
Caballero proclamou que a demanda do PP vigués “é para que dimitan todos”, porque parecen non asumir “a responsabilidade” do seu partido no atraso dos proxectos. “Pero é que ademais, está todo desbloqueado (polo goberno de Pedro Sánchez)”, engadiu.
O alcalde preguntou se os populares “non se decataron” de que Vigo xa ten cedido o edificio para biblioteca en Teis, que ten o visto e prace á biblioteca do Estado, o estudo hidroxeolóxico do AVE por Cerdedo adxudicado, en tramitación a nova autovía Vigo-O Porriño, o estudo sobre a conversión en viaria urbano da AP-9 en Teis xa “acordado”, ou en marcha tamén o estudo sobre o abastecemento de auga.
“Onde viven os señores do PP, na Coruña ou en Honolulú? Non se decatan?”, ironizou o rexedor olívico, quen tachou de “calamidade” o grupo municipal encabezado por Alfonso Marnotes, e do que lembrou que “tiveron que pór de portavoz ao número 20 da lista” porque os anteriores “non valían”.
Segundo Abel Caballero, os concelleiros do PP vigués “non se decatan, ou menten ou son uns ineptos”. “Así están, en catro concelleiros, a cidade xa os castigou”, engadiu, á vez que incidiu en que, ao contrario que o Goberno de España, é a Xunta a que “desatende” á cidade, cuxo goberno local ten que asumir servizos e actuacións que son “competencia exclusiva” da administración autonómica.
AXUDAS AO ALUGUER
Por outra banda, o alcalde referiuse tamén a aqueles que reclaman “desde o PP ou afíns ao PP” medidas ao Concello en materia de vivenda social, e lembrou que foi o goberno municipal a única administración que deu axudas ao aluguer a familias necesitadas.
A ese respecto, Caballero constatou que as axudas do programa de aluguer da Xunta para 2018, que se financian con fondos estatais, “aínda están sen resolver”, e que o Goberno galego non vai pagar aos solicitantes que xa tiveron axudas municipais porque “non teñen facturas”.
Así, incidiu, o Concello pagou os alugueres de 700 vivendas en 2018 e non hai facturas diso, polo que a Xunta non pagará as axudas a esas familias, e “afórrase o diñeiro”.
