Ámbolos dous candidatos a reitor da Universidade de Vigo, Manuel Reigosa e Emilio Fernández, referíronse á polémica suscitada polas supostas irregularidades cometidas no máster que a presidenta da Comunidade de Madrid, Cristina Cifuentes, teóricamente cursara na Universidad Rey Juan Carlos.

“Véxoo con preocupación e con vergoña allea, é algo impensable nunha universidade pública”, sentenciou Manuel Reigosa. O candidato asegurou que unha situación como esa “non pasaría de ningunha maneira nunha universidade galega”.

Ademais, expresou o seu desexo de “que non se utilice isto para atizar sentimentos en contra da universidade pública”. “A universidade pública fai as cousas ben normalmente, somos rigorosos e, desde logo, non se regalan os títulos nin moito menos”, afirmou.

Pola súa parte, o outro candidato a reitor, Emilio Fernández, recoñeceu que “é moi triste para a Universidade en xeral” porque “proxéctase unha imaxe moi mala” da institución académica e “xérase desmoralización” entre os membros da comunidade universitaria.

Fernández proclamou que “na inmensísima maioría” dos miles de másteres que se imparten nas universidades públicas españolas non existen irregularidades, e sinalou que o ocorrido con Cifuentes e a Universidade Rey Juan Carlos “debe animar a extremar a precaución e os esforzos para vixiar que este tipo de prácticas non ocorran dentro das institucións”.