O candidato de Unidas Podemos a presidencia do Goberno e secretario xeral de Podemos, Pablo Iglesias, non sabe cal é o porto pesqueiro máis importante de Europa. Nunha visita á lonxa da Coruña, cualificou como “unha honra” e “un orgullo” visitar as instalacións do porto coruñés, ao que cualificou como “probablemente, o máis importante de Europa de descarga de peixe fresco”. Un erro do que ninguén lle sacou.
Iglesias semella que non consultou os datos oficiais: Vigo é o porto líder en Europa en descarga de peixe fresco. Só o ano pasado, a lonxa viguesa foi a que máis desembarcos de pesca fresca rexistrou, con 78.169 toneladas, case o dobre que A Coruña (42.418 toneladas), que ocupa o segundo posto en España.
