O alcalde de Vigo e presidente da agrupación socialista olívica, Abel Caballero, proclamou este luns que Pedro Sánchez “foi o presidente que máis fixo por Vigo en toda a historia”, e convidou “a toda a cidade”, a que acuda ao mitin que o candidato socialista ofrecerá este martes ás 19,00 horas no Auditorio Mar de Vigo.
Nunha comparecencia ante os medios convocada polo PSOE vigués, Abel Caballero pediu aos cidadáns que acudan a ese acto electoral para que “vexan ‘in situ’ todo o que Pedro desbloqueou de obras na cidade en só oito meses”.
Caballero proclamou que quere “contarlle á cidade” todos eses proxectos que, asegurou, o goberno socialista impulsou, despois de ser “bloqueados por Rajoy e por Feijóo”.
A ese respecto, o rexedor aseverou que, durante a campaña electoral, el falará de Vigo, do que o PSOE fixo e do que lle pedirá que faga o próximos catro anos. “A miña campaña é a miña cidade, e niso vou estar todo o tempo”, sentenciou.
