O profesor da Universidade de Vigo (UVigo) Alfonso Lago Ferreiro será o novo subdelegado do Goberno en Pontevedra en substitución do vigués Abel Losada, que deixou o cargo para encabezar a candidatura do PSOE ao Congreso dos Deputados pola provincia nas eleccións do vindeiro 29 de novembro.

Lago Ferreiro, que xa foi nomeado de forma provisional, tomou posesión como novo subdelegado este xoves. Ademais, segundo informaron fontes consultadas por Europa Press, o próximo día 30 de outubro está previsto que teña lugar un acto institucional con motivo do seu nomeamento.

Nado en Silleda (Pontevedra) en 1962, é licenciado en Ciencias Físicas, especialidade en Electrónica, pola Universidade de Santiago de Compostela, e doutor enxeñeiro industrial pola Uvigo. Formou parte do anterior equipo reitoral que dirixiu a Universidade de Vigo e o de subdelegado é o primeiro cargo público que ocupa fóra do ámbito académico.