O BNG de Vigo reiterou este luns a súa petición de información ao goberno local sobre os gastos que tivo que asumir a cidade para acoller os actos do Día das Forzas Armadas, incluído o desfile do pasado sábado. Os nacionalistas advertiron de que, se non se lles facilita esa información, reservan o dereito de acudir á Valedora do Pobo e mesmo á vía xudicial. Nun comunicado, o voceiro do grupo nacionalista, Xabier Pérez Igrexas, lembrou que o seu grupo xa reclamara estes datos no Concello, pero só recibiu “silencio”.

Por iso, volveu esixir que o goberno local achegue información detallada sobre os custos desa celebración en ámbitos como seguridade, limpeza, mobilidade, persoal, acondicionamento de espazos públicos, cesión de instalacións municipais e outros gastos. Entre estes últimos, citou “a fastuosa recepción” ao rei Felipe VI e á infanta Leonor no Consistorio, da que, segundo denunciou, “non foron informados os grupos da oposición”.

Así, “diante do intento descarado de evitar que os vigueses coñezan canto custou ser sede deste innecesario acto de exaltación militarista e españolista”, o BNG apelou ao regulamento do pleno para obter esa información e advertiu de que o goberno local ten cinco días para facilitala. No caso de non facelo, indicou Pérez Igrexas, o grupo acudirá á Valedora do Pobo e á Comisión de Transparencia, ademais de reservarse o exercicio de “todas as accións legais necesarias”. Finalmente, o voceiro nacionalista proclamou que a cidadanía viguesa, que sofre, entre outros recortes, os que afectan ás axudas sociais, “ten dereito a coñecer o importe da factura” do desfile e do resto de actos.