O alcalde de Vigo, Abel Caballero, recoñeceu este mércores que, sen Orzamentos Xerais do Estado (PGE), non se poderá construír a Biblioteca do Estado, cuxo orzamento está “entre 25 e 30 millóns de euros”. Así o trasladou, a preguntas dos medios, durante o acto de posta da primeira pedra da futura biblioteca municipal de Teis.

O alcalde matizou, en primeiro lugar, que o Ministerio de Cultura xa ten os terreos (á beira dos antigos xulgados da rúa Lalín) á súa disposición, aínda que admitiu que aínda non se formalizou a cesión por parte do Concello. Non se necesita a cesión para pola a disposición. A cesión é un pouquiño máis lenta porque require un pouquiño máis de papelorios, pero xa a puxemos á súa disposición”, explicou, e engadiu que o Ministerio “xa pode operar no proxecto e, eventualmente, na edificación”, pondo como exemplo a construción do novo IES de Navia por parte da Xunta, cun terreo posto a disposición pero “non entregado aínda”.

Con respecto ás críticas do PP por non ceder aínda os terreos para a Biblioteca, o alcalde sinalou que son “unha bobada”. En calquera caso, apuntou que o problema é que “non hai Orzamentos” e instou aos ‘populares’ a aprobar as contas do Executivo. “Con que digan que voten o Orzamento xa está arranxado porque nos borradores de orzamentos xa aparecen as partidas para desenvolver o proxecto que vai ser un proxecto arquitetónico singular, distinto”, indicou o rexedor olívico.

Caballero lembrou que, segundo as últimas estimacións do propio Ministerio, a Biblioteca do Estado de Vigo custará “entre 25 e 30 millóns de euros”, “e isto é o que vai aparecer en partidas no Orzamento se, efectivamente, a oposición está disposta a cooperar para a aprobación”. “Que o Partido Popular non me diga nada da Biblioteca do Estado en Vigo, porque son eles os que co seu voto en contra non queren que se faga”, denunciou.

Preguntado se a construción da Biblioteca depende de que haxa PGE (aínda que o ministro Urtasun sinalou en xullo do ano pasado que había crédito para o proxecto, mesmo sen PGE e que se licitaría ao longo de 2026), o alcalde de Vigo insistiu que, dado o custo da infraestrutura, “ten que estar nos Orzamentos”. Segundo afirmou, mentres tanto, o Ministerio pode facer “avances e borradores”, que “é o que está a facer”.