O alcalde de Vigo, Abel Caballero, cualificou os anuncios da Xunta sobre a construción de vivenda pública na cidade como “contos chineses”, e insistiu en que o Concello, sen ter as competencias, “está a programar” máis vivenda protexida que o goberno autonómico. En declaracións enviadas aos medios, o rexedor olívico referiuse á aprobación no Consello da Xunta da declaración de Proxecto de Interese Autonómico (PIA) para habilitar chan residencial no ámbito do Ofimático e construír unhas 2.000 vivendas. “Vólvennos a contar contos chineses. Din que vai ser marabilloso e que o van a acabar enseguida. Non, non é certo”, proclamou Caballero.

Respecto diso, o alcalde volveu a repetir que o problema do acceso á vivenda en Vigo é a falta de parque residencial público, o que eleva os prezos, e responsabilizou á Xunta, competente en materia de vivenda, que “nos últimos 17 anos non fixo nin un só piso con algún tipo de protección” na cidade. “Teñen que pedirlle perdón a esta cidade. Téñenlle que pedir perdón e desculparse diante da xente nova que quere alugar un piso e que a súa renda lle chega moi dificilmente”, proclamou Abel Caballero, que reiterou que a Xunta “considera que Vigo é só para coller o diñeiro e levarllo a outros sitios”. “Onde está o investimento?”, cuestionou, antes de sinalar que o goberno galego “está a facer pouquiño máis de 200 pisos” en Navia, mentres que o Concello, sen ter competencias, está “a programar máis vivendas”.

Segundo o alcalde, “hai un gran culpable, que se chama Feijóo, e un segundo gran culpable, que se chama Rueda, e un cómplice, o PP de Vigo”, ao que acusou de permanecer calado sen pedir explicacións á Xunta. “Caladiños, caladiños, non vaia ser que a Xunta de Rueda non a meta nas listas. Porque ao final vai diso. O PP de Vigo é un PP politicamente moi débil, non teñen forza, son inexistentes”, afirmou Caballero, quen tamén lembrou que os populares vigueses “nin sequera conseguiron presidir a Deputación de Pontevedra”.