O presidente da Deputación de Pontevedra, Luís López, lamentou que o alcalde de Vigo, Abel Caballero, “dese volta” e non asistise ao acto de presentación da reforma da piscina de Teis, financiada ao 70 % polo ente provincial cun investimento de 5 millóns de euros. Nun comunicado, López criticou que o rexedor “cancelase a última hora” a súa presenza no encontro pactado entre ambas as administracións pola presenza da vicepresidenta provincial Luisa Sánchez.

O acto, segundo a Deputación, pretendía pór en valor a colaboración acordada para levar a cabo esa obra, como se adoita levar a cabo nos restantes concellos da provincia cando se pacta algún investimento. “É importante que haxa colaboración e que se vexa. A xente non quere confrontación e esta era unha mensaxe que queriamos lanzar a Vigo, á provincia e a Galicia. Cónstame que o alcalde viña pero deu volta polo feito de que estivese aquí, como unha veciña máis porque as vías son públicas, a vicepresidenta”, explicou Luís López.

Respecto diso, o presidente puxo en valor o papel desenvolvido por Luisa Sánchez, que se entrega “en corpo e alma” para recoller as necesidades dos vigueses e para tratar de atoparlle unha solución. “A Deputación ten palabra e cúmprea, por iso cando dixemos que a cidade máis importante da provincia ía ter como mínimo o mesmo trato que co goberno anterior, meu dito meu feito”, reivindicou.

Pola súa banda, tanto o alcalde como o portavoz do goberno local, Carlos López Font, enviaron senllos audios aos medios de comunicación solicitando á Deputación máis investimento para Vigo, indicando que a cidade achega ao ente provincial 85 millóns de euros, segundo os seus cálculos, “e só lles devolvesen 5 millóns”. Así, lembraron que esta cantidade (5 millóns) era a pactada coa Deputación cando a presidía Carmela Silva. Agora pídenlle que a incrementen segundo o IPC, con preto de 1,5 millóns máis.