A delegada da Xunta en Vigo, Ana Ortiz, pediu ao alcalde, Abel Caballero, que “deixe de enganar” aos vigueses e “faga os seus deberes”: “Non existe nada pendente do túnel de Elduayen”. Así o sinalou nun audio enviado aos medios de comunicación tras as palabras do rexedor, que acusou o Goberno galego de paralizar, a través de Patrimonio Cultural, “un número importantísimo de obras” na cidade. En concreto, Caballero referiuse agora á reforma dos accesos á capela da Guía que, segundo dixo, “están parados desde maio” por Patrimonio. Cómpre lembrar que ese acceso leva máis de tres anos pechado. O alcalde tamén falou das ramplas mecánicas da Gran Vía, “paralizadas desde agosto” ou da reforma de Praza do Rei e de Elduayen.
RESPOSTA
Ante esta situación, Ortiz asegurou que Patrimonio xa respondeu o mes pasado sobre o proxecto da Guía, asegurando tamén que “non existe nada pendente do túnel de Elduayen”, xa que a resposta foi enviada no verán por parte da Xunta. “Que non pase nin un só día no que o alcalde mente a propósito”, lamentou Ortiz, pedíndolle a Caballero que “faga os seus deberes” porque “ten todo parado desde hai anos”, apuntando, entre outras, ás obras na ETEA, do Ifevi ou a sinalización do Camiño de Santiago na cidade. Sobre as ramplas da Gran Vía, a delegada da Xunta dixo que o Concello enviou a documentación en setembro, polo que “está en prazo”, mentres que o proxecto da Praza do Rei foi enviado hai un mes, estando tamén en prazo. “Deixe de enganarnos”, sentenciou.
