O PSOE do Porriño denunciou que o PP tratou de levar a pleno unha iniciativa que incluía un expediente asinado por unha persoa que xa falecera no momento da suposta rúbrica.

Nun comunicado, os socialistas indicaron que nas pasadas comisións informativas, previas ao pleno de setembro, os ‘populares’ presentaron un punto para a expropiación dun camiño na zona de Atios. “No citado expediente constaba un documento de 24 de febreiro de 2025 no que os grupos da oposición advertimos da firma dunha persoa falecida o 31 de decembro de 2011, entre os titulares das parcelas asinantes”, indica o PSOE.

Por iso, instouse a que se retirase ese punto do pleno ata que se esclarecese o ocorrido. Con todo, o punto si entrou na convocatoria, sendo retirado durante a celebración do pleno tras rexistrar os socialistas unha petición para aclarar este feito, incluíndo un certificado de defunción da persoa asinante, que se trataría do pai dun concelleiro.

“A inclusión da firma dun falecido podería constituír falsidade documental grave, unha presunta usurpación de estado civil e viciar de nulidade todo o procedemento”, apuntou o portavoz socialista, David Alonso.