O grupo municipal do PP no Concello de Vigo censurou a “mala fe” do goberno local de Abel Caballero, que culpou á Xunta do atraso na instalación dos quioscos de praia, cando en realidade foi a administración local a que solicitou as autorizacións fóra de prazo. En declaracións remitidas aos medios, o portavoz ‘popular’, Miguel Martín, lamentou que “o peor” do goberno de Caballero non é só a súa “nefasta xestión”, senón “a súa mala fe para culpar a outros da súa propia incompentencia”.
Así se referiu o concelleiro á posición do Concello tras coñecerse que a apertura dos quioscos de praia atrasarase este ano. O Concello solicitou permiso para a instalación de 11 ‘chiringuitos’, dos que 5 dependen da autorización da Xunta (o resto son responsabilidade, mentres non se execute a transferencia da competencia, do Estado).
Fontes municipais aseguraron nas últimas horas que o motivo da tardanza, que impedirá a apertura o 1 de xuño, foi a demora da Xunta en conceder os permisos. Con todo, o Concello pediu esas autorizacións o pasado 17 de xaneiro, fóra de prazo (o prazo era o último trimestre de 2024), e a Xunta respondeu alegando que, con todo, tramitou con celeridade a solicitude e notificou a resposta favorable o pasado 13 de maio.
Miguel Martín subliñou que “a culpa de que este domingo 1 de xuño non haxa chiringuitos nas praias da cidade é toda do goberno de Abel Caballero” e constatou que, “unha vez máis, os feitos desmontaron a súa mentira”.
