O pleno extraordinario no que se debaterá a cuestión de confianza vinculada aos orzamentos municipais de Redondela para 2025 xa ten data: será o 5 de maio. Así o confirmou a alcaldesa redondelana, a socialista Digna Rivas, nun comunicado remitido aos medios, no que insistiu en defender as contas presentadas, que ascenden a 22,6 millóns de euros, e que non puideron saír adiante pola negativa do PP e do BNG (os socialistas gobernan en minoría cun concelleiro de AER, o que suma 8 votos, fronte aos 13 que suman PP e BNG).
O pleno extraordinario celebrarase o 5 maio ás 20.00 horas no auditorio da Xunqueira, e a alcaldesa volveu a repetir que non ten “ningún apego ao cargo” e que só se debe aos cidadáns que decidiron democraticamente que ela sería rexedora. Digna Rivas repetiu que estes orzamentos son “para as persoas”, con partidas que suman case 3 millóns de euros destinados a políticas sociais; con 260.000 euros para orzamentos participativos, ademais de investimentos en saneamento e outras iniciativas. O goberno local lamentou que nacionalistas e ‘populares’ rexeitasen as contas “sen propor alternativas”, e insistiu en que o único obxectivo da oposición é “afogar” ao goberno municipal que, non entanto, “vai seguir traballando con máis forza que nunca”. Finalmente, a alcaldesa repetiu que vai esgotar ” o mandato” e a seguir traballando “por e para Redondela”.
