O alcalde de Vigo, Abel Caballero, arremeteu este venres contra o BNG e contra o deputado Néstor Rego, que se reuniu coas plataformas de afectados polo novo trazado da A-52, pola súa oposición ao novo trazado desta autovía (en túnel desde Vigo ao Porriño) e acusou aos nacionalistas de pretender deixar á cidade sen a infraestrutura, “enganando” e descoñecendo a situación do actual viario.
Nunhas declaracións remitidas aos medios, o rexedor olívico censurou que viñese un deputado “desde A Coruña” a dicir “aos de Vigo como teñen que ir a Madrid”. Tras criticar que o BNG “di o que sempre di, que é ‘non'”, acusou aos nacionalistas de falar da autovía sen coñecer a súa situación de sinistralidade, o tempo e o percorrido que supón. “O primeiro que lle teño que dicir ao señor Rego é que se decate un pouquiño, que veña a Vigo e coñeza isto porque, claro, vén de visita, e non sabe nin de que fala”, aseverou o alcalde.
Caballero advertiu de que o Goberno fará a nova autovía “a petición do alcalde de Vigo”, para facer ese percorrido en 4 minutos, e reiterou que a liberación da peaxe da AP-9 nese tramo non é unha alternativa viable. “É que vostede, claro, como non sabe, non o fixo nunca, pois non sabe como é”, afirmou, antes de explicar todas as conexións e rodeos que deben facerse para saír da autovía, entrar na autoestrada e volver á A-52. “De que está a falar vostede? Sabe que lle pasa señor Néstor Rego? Que vostede non fixo ese traxecto nunca na súa vida”, sentenciou Caballero, que acusou aos nacionalistas de querer “tomarlle o pelo” á cidade de Vigo.
O alcalde acusou ao deputado do BNG de pedirlle ao Goberno “que non gaste en Vigo”, é dicir, “o mesmo que Feijóo”. “Non se pode vir aquí de visita e insultar a esta cidade”, apuntou Caballero, que cualificou de “dislate” a alternativa proposta polos nacionalistas, e insistiu en que a afección da obra exposta polo Ministerio será de entre 15 e 20 vivendas entre Vigo e Mos. Por outra banda, Caballero acusou aos nacionalistas de quedar “vergoñentamente calados” cando os diferentes gobernos do PP atacaron a Vigo, deixando á cidade sen AVE, ou tentando deixala sen partido xudicial, ou “cando Feijóo dixo que quería pechar o aeroporto de Peinador”.
Igualmente, afeou ao BNG que queira recorrer agora á AP-9 como alternativa, cando os nacionalistas se opuxeron á construción da autoestrada no seu día porque era unha “navallada”. “Vostedes son uns mentireiros, veñen mentir, veñen enganar, reúnense con xente que está na mentira e no engano, e non llo imos a deixar”, recalcou o rexedor, e engadiu: “Dos afectados e de estar ao seu lado e acompañalos en todo o proceso, encargareime eu”.
