O portavoz do grupo municipal do PP de Vigo, Miguel Martín, cualificou de “bochornoso” que o alcalde, Abel Caballero, “non dese nin unha soa explicación” tras a sentenza do xulgado do Contencioso Administrativo que condena ao Consistorio a pagar uns 2 millóns de euros á promotora do concerto de Guns N’ Roses (que tivo lugar en xuño de 2023).

“A contundente sentenza xudicial confirma que o escándalo do patrocinio do concerto de Guns N’ Roses comezou con el reuníndose coa promotora na Alcaldía o 20 de outubro de 2022 antes, por tanto, de que se sacase a concurso aberto a contratación do evento”, criticou Martín este sábado nun comunicado.

A continuación, afeou que o alcalde non comparecese en rolda de prensa e “nin sequera quixo” que o fixesen os dous concelleiros implicados no caso, que “xa deberían dimitir”.

Neste sentido, incidiu en que “o único que fixo” o goberno local foi enviar “un audio enlatado” do portavoz no que “apenas se di o que publicaron nun comunicado de prensa do pasado xoves”.