O PP de Vigo criticou “outro fracaso” do alcalde, Abel Caballero, despois de que o Goberno central “negase” 1,5 millóns de euros solicitados polo Concello para acometer melloras no Museo-Pazo Quiñones de León de Castrelos. Nun comunicado, o grupo municipal ‘popular’ responsabiliza ao rexedor socialista desta “mala noticia”, dado que o proxecto presentado polo Concello quedou fóra das axudas por “baixa puntuación”.

En concreto, a proposta olívica recibiu 66 puntos e situouse por detrás doutras 30 solicitudes desestimadas, é dicir, “moi lonxe” das candidaturas aprobadas, subliña o PP. O portavoz ‘popular’, Miguel Martín, lamentou que o alcalde dese este diñeiro por concedido, “do mesmo xeito que ocorreu cos 6 millóns do PERTE da auga”. “Fala moito e moi rápido, pero o tempo acaba por demostrar as súas mentiras”, engadiu.

“Dáse a circunstancia de que esta é a segunda ocasión que o goberno de Caballero non consegue esta subvención, pois xa o tentou sen éxito en 2022. Cabe lembrar, ademais, que o alcalde vigués asegurou previamente e con rotundidade que o Concello recibiría estas axudas convocadas polo Ministerio de Industria e Turismo para proxectos de mellora do patrimonio histórico con uso turístico”, engadiron desde o PP.

ORZAMENTO ESGOTADO

Ante estas palabras, o Concello non tardou en saír ao paso. Noutro comunicado, quixo aclarar que o proxecto presentado por Vigo non conseguiu os fondos porque se esgotou o orzamento da convocatoria, reivindicando que contaba con 16 puntos por enriba da nota mínima esixida. Ademais, subliñou que a iniciativa para Castrelos conseguiu máis puntos que o proxecto presentado pola Xunta para o Pazo de Lourizán, “cuestión que parece esquecer o grupo Popular”. “O Concello xa presentara un recurso na primeira convocatoria na que si obtivo fondos para a recuperación do Pazo da Raposeira”, lembrou.