O goberno de Vigo respondeu á segunda invitación realizada desde a Xunta (polos conselleiros de Presidencia e de Infraestruturas, Diego Calvo e María Martínez Allegue) advertindo de que a posición municipal quedou “ben clara” na resposta remitida hai uns días á primeira invitación e reiterando que a Xunta debe “asumir as prioridades da cidade” e o PP debe “pedir perdón” por deixar a Vigo sen AVE.
Na misiva, a tenente de Alcalde, Carmela Silva, denuncia a “mentira flagrante” da Xunta por non recoñecer que xa houbo unha resposta á invitación o pasado 6 de novembro. “Por se non o leron con atención, lémbrolles que nesa resposta pedímoslles que asumisen as prioridades da cidade e que, se pedían perdón por deixala sen tren de alta velocidade, aínda que fóra con 20 anos de atraso, estariamos dispostos a falar”, expón Silva. Con todo, a concelleira socialista insistiu nos argumentos do goberno local, lembrado que foi o PP “con Aznar primeiro, e con Rajoy e Ana Pastor despois”, e con Núñez Feijóo na Xunta, o que “excluíu” a Vigo da posibilidade dun AVE directo á Meseta, priorizando a conexión por Ourense, Santiago e A Coruña.
Tras reiterar que a liña por Cerdedo “si avanzou” con Zapatero e agora co goberno de Pedro Sánchez, tamén se referiu ao AVE Vigo-O Porto e ao saída sur, e acusou ao PP de “ocultar que é posible grazas ao actual alcalde, Abel Caballero”. “A súa desvergoña política é tal que nesa pretendida convocatoria de defensa do AVE tentan silenciar que foron vostedes os que castigaron a esta cidade. Pedirán perdón á cidadanía por ter que ir a Madrid por Santiago?”, incidiu Silva, que repetiu que os ‘populares’ deberían, nesa concentración, “asumir os seus erros e pedir perdón, aínda que sexa con 20 anos de atraso”.
Finalmente, a tenente de Alcalde lembra que Abel Caballero “xa ten convocadas varias concentracións en defensa do tren de alta velocidade “e en defensa da dignidade da cidade” que o PP “ataca continuamente”. “En calquera caso, como lles trasladei na resposta do 6 de novembro, se asumen as prioridades da cidade, piden perdón e esixen responsabilidades políticas aos causantes que aínda están en activo, estaremos dispostos a falar de todas estas cuestións”, conclúe a carta.
CABALLERO CHAMA A ACUDIR AO CONCERTO REIVINDICATIVO
Pola súa banda, o alcalde de Vigo, Abel Caballero, fixo este mércores un chamamento aos cidadáns para que acudan o próximo 26 de novembro ao concerto reivindicativo que convocou para defender o AVE directo entre a cidade e Madrid por Cerdedo. “Non queremos dar a volta en tren por Santiago, con 50 minutos de atraso e a humillación de non ter unha liña directa. Por iso facemos este concerto reivindicativo con ACOPOVI (Asociación de Corais Polifónicas de Vigo), para dicirlle a todo o mundo que Vigo quere o AVE directo por Cerdedo”, proclamou, nunhas declaracións remitidas aos medios.
Segundo subliñou o rexedor olívico, “Vigo xera máis viaxes en AVE que ningunha outra cidade de Galicia” e a área viguesa xera máis demanda que a área que cobre a actual liña Ourense-Santiago-A Coruña. Por iso, convocou á cidade a participar nese concerto reivindicativo, que terá lugar na Porta do Sol ás 20.00 horas do próximo 26 de novembro. Ademais, están convocados outros dous concertos, un o 11 de decembro para reclamar o AVE Vigo-O Porto e o saída Sur, e un terceiro o 3 de xaneiro, en defensa dunha nova autovía en túnel de Vigo ao Porriño.
