A eurodeputada do BNG, Ana Miranda, alertou a Bruxelas dun posible “uso indebido” de fondos europeos para a ampliación do túnel de Elduayen, en Vigo, o cal considera “innecesario”.

Así, a nacionalista dirixiu unha pregunta á Comisión Europea precisamente sobre esta obra en Porta do Sol da cidade olívica e sobre o posible uso indebido de fondos para a construción da devandita infraestrutura.

Segundo recolle o BNG nun comunicado, Miranda apunta que desde que inicialmente se comezou o proxecto en 2020, cunha licitación inicial de 13,4 millóns de euros, o custo da obra executada elevouse ata os 16,6 millóns.

“Pero previsiblemente o custo das obras aumentará, xa que as últimas informacións sinalan a que a ampliación do túnel ata Torrecedeira custará 20 millóns de euros, o que suporía un sobrecusto do 63% sobre a contía prevista inicialmente”, indicou.

“Dado que neste catro anos puxéronse en marcha alternativas ao tráfico nesta zona, de xeito evidente parece que a construción deste túnel é innecesaria e superflua, ademais dun gasto inútil”, sinalou Miranda, lembrando que un dos obxectivos da Axenda Verde Europea é reducir o uso dos vehículos privados no centro das cidades.

Ela sinalou que as obras están supeditadas a un aumento do financiamento que levará a cabo mediante unha reprogramación dos fondos europeos “e non en aras de mellorar a calidade do aire dunha cidade que supera xa os límites leais de contaminación da UE para 2030”.

Na mesma liña falou o portavoz municipal do BNG, Xabier Pérez Iglesias, que cuestionou que o goberno local pretenda “enterrar un total de case 40 millóns de euros nun macrotúnel” que se demostrou que é “absolutamente innecesario”.