O alcalde de Vigo, Abel Caballero, pediu á Xunta de Galicia que inclúa unha partida “simbólica” duns 50.000 euros no seu orzamento do ano que vén para o túnel de Elduayen, xa que aínda carece de proxecto construtivo.
Así o sinalou nun audio enviado aos medios de comunicación, onde o rexedor respondeu ao ofrecemento do Executivo autonómico de financiar ata un 38% desta obra, instando o goberno local a engadir unha partida nas contas de 2025.
Respecto diso, Abel Caballero asegurou que o Concello dispón de proxecto básico, pero aínda se está terminando o proxecto construtivo, polo que non espera poder licitar a obra ata 2025.
“En 2025, como xa temos pagado o proxecto cos nosos fondos, imos pór especificamente para isto unha partida de 50.000 euros e propóñolle á Xunta que poña unha partida similar. É máis simbólico, porque en 2025 o que se está facendo é o proxecto, e o seu financiamento xa está cuberta polo Concello”, engadiu o alcalde de Vigo, a pesar de que se calcula que o proxecto custará uns 20 millóns de euros.
Segundo el, será en 2026 e 2027 cando ambas as administracións “terán que achegar os fondos xa de forma consistente”. Así mesmo, pediu unha reunión da comisión de infraestruturas creada despois do seu encontro co presidente da Xunta, Alfonso Rueda, para tratar este tema e que a obra “vaia á maior velocidade posible”.
“FALTA DE XESTIÓN”
Tras coñecerse as declaracións de Abel Caballero, a Xunta non tardou en reaccionar. Foi a delegada territorial do Executivo galego en Vigo, Ana Ortiz, a que enviou tamén un audio aos medios de comunicación asegurando entender “por fin” a razón pola que o alcalde tardou “10 días” en responder o ofrecemento da Xunta de cofinanciar o túnel de Elduayen.
“Confirma o que tiñamos claro. Non ten proxecto para un túnel anunciado fai nove anos aos catro ventos”, lamentou, indicando que o problema tamén é que non ten orzamento para unha obra anunciada hai tanto tempo.
Ortiz subliñou que esta era “outra manobra de distracción” coa intención de culpar á Xunta da súa “falta de xestión” nun proxecto que leva “nove anos de atraso”. A pesar de todo, destacou que o Executivo autonómico mantén o seu compromiso “a pesar dos titubeos do alcalde”.
