O alcalde de Vigo, Abel Caballero, celebrou este venres o visto e prace da Dirección Xeral de Urbanismo da Xunta ao novo Plan Xeral de Ordenación Municipal (PXOM) da cidade, que cualificou como “magnífico”. En declaracións remitidas aos medios, o rexedor confirmou a recepción do informe favorable por parte da administración autonómica e sinalou que, unha vez xustificadas as observacións realizadas ao Plan, enviarase á Dirección Xeral de Costas, que informará “favorablemente”.

A partir de aí, o Concello estará en disposición de levar o documento urbanístico a Pleno para a súa aprobación definitiva. “O PXOM de Vigo vaise a aprobar con algo moi importante: todos os informes favorables“, proclamou, á vez que lembrou que o Plan de 2008, anulado en 2015 polo Tribunal Supremo, tiña “algúns informes que non eran favorables”.

Segundo Abel Caballero, este é “un Plan magnífico, para vivenda alcanzable, que non admite a especulación, con zonas verdes, espazos dotacionais”, en definitiva, “o PXOM que necesita a cidade de Vigo”. Mentres, o grupo municipal do PP valorou “positivamente” o avance na tramitación e, aínda que recoñeceu que non é o plan que os ‘populares’ terían feito, apuntou que “Vigo non pode esperar máis”.

Así o trasladou a concelleira Luisa Sánchez, que lembrou a necesidade de vivenda a prezo alcanzable, e de desbloquear proxectos. “Esperamos que o Goberno de España non demore o visto e prace (…) e máis despois dos atrasos continuos nos que incorreu o goberno de Abel Caballero”, engadiu, tras sinalar que a Xunta acelerou os trámites para axilizar a aprobación.

BIBLIOTECA DO ESTADO

Por outra banda, o alcalde tamén avanzou que a semana que vén aprobarase definitivamente o Plan Especial de Infraestruturas e Dotacións para a localización da Biblioteca do Estado, na contorna dos antigos xulgados da rúa Lalín. Unha vez superado ese trámite e cando se produza a aprobación en Pleno, o Concello poderá pór a disposición do Goberno de España os terreos para a construción desta infraestrutura cultural.

Caballero volveu a denunciar que a Xunta “se opuxo ferozmente” á construción desta biblioteca, que agora está en marcha “definitiva e irreversiblemente”, e que, nunha primeira estimación realizada polo entón ministro Miquel Iceta, o investimento roldará os 22 millóns de euros.