O alcalde de Vigo, Abel Caballero, reivindicou o “tirón” do Nadal na cidade, cunha ocupación hoteleira media do 70,5 % durante o pasado mes de novembro, con fins de semana a case o 100 %. Segundo cifras plasmadas polo rexedor nun audio enviado aos medios de comunicación, esta porcentaxe é superior á do ano pasado, cando en novembro a ocupación hoteleira situouse sobre o 68 %, insistindo en que “historicamente” en novembro era “practicamente nula”.

En canto aos lugares de procedencia, Caballero dixo que un 12 % dos turistas vén doutros puntos de Galicia e un 55 % doutros lugares de España. Ademais, máis dun 30 % son viaxeiros internacionais, sendo a metade destes de Portugal. O alcalde subliñou os “miles e miles de postos de traballo” que se crean grazas ao Nadal na cidade, non só nos hoteis, senón en restaurantes, cafetarías ou comercios.