O grupo municipal do BNG no Concello de Vigo reclamou este venres ao goberno local máis recursos para políticas sociais, en lugar da “propaganda obscena” do alcalde, Abel Caballero, que “presume” de outorgar axudas de emerxencia a familias vulnerables ocultando que a tramitación “chega a tardar ata dous meses”.

O portavoz do grupo, Xabier Pérez Igrexas, advertiu de que as manifestacións do rexedor son “a demostración da absoluta falta de sensibilidade social do goberno municipal” e lembrou que se destina máis diñeiro a subvencionar voos en Peinadora ou a luces de Nadal “que a atender as necesidades das máis de 60.000 vigueses e viguesas en risco de exclusión social e pobreza”.

“Falamos de que a media das axudas outorgadas no que vai de ano é de 336 euros, menos do que o Concello paga aos membros da Corporación por acudir a un pleno ordinario”, ironizou Pérez Igrexas.

Por iso, reclamou ao alcalde a “deixar de presumir da esmola dunhas poucas axudas, nunha actitude que lembra moito á indecente caridade doutros tempos” e mobilice máis recursos para axudar a quen máis o necesita, reforzando tamén o persoal dos servizos sociais municipais.