O pleno do Concello de Vigo aprobou este martes, nunha sesión extraordinaria e cos únicos votos favorables do grupo de goberno (PSOE), unha modificación e un suplemento de crédito por un importe total de case 32 millóns, que se destinarán ao pago da compensación a Vitrasa polas perdas derivadas da pandemia de Covid, certificacións e revisións de prezos de obras, novas actuacións e cumprimento de varias resolucións xudiciais.

O grupo socialista defendeu que esta modificación de crédito pon de manifesto a boa saúde financeira do Concello de Vigo, xa que se fai con cargo a remanentes, fronte ás críticas dos grupos da oposición –a quen o goberno local tacha de “agoreiros e aguafiestas”–, que lamentan a “nefasta xestión” e a falta de execución orzamentaria do goberno encabezado por Abel Caballero.

Así, o concelleiro de Facenda, relatou os investimentos que se farán con estes fondos extraordinarios: destinaranse 1,1 millóns de euros a dar cumprimento a unha sentenza do TSXG, que obriga ao Concello a facerse cargo das obras de mellora e reparación do Paseo de Bouzas; tamén se pagarán 6,8 millóns recolleitos na sentenza relativa á resolución do contrato dos aparcadoiros de Castelao, Rosalía de Castro e Jenaro de la Fuente, unha situación “herdada do anterior goberno do PP”; e pagarase máis de medio millón de euros á SGAE por outra sentenza e por débedas pendentes.

Un terzo do diñeiro destinarase a abonar a Vitrasa (concesionaria do bus urbano) a compensación polas perdas derivadas da pandemia, un total de 12,1 millóns de euros, e o resto utilizarase para sufragar revisións de prezos de obras xa en marcha ou finalizadas, para completar o pago de actuacións como o ascensor HALO, ou para levar a cabo traballos de humanización e melloras en varias rúas da cidade.

O portavoz do grupo socialista, Carlos López Font, sinalou que a decisión do pleno supón “máis humanizacións e máis actuacións para a cidade máis feliz de España”, e criticou que os grupos da oposición, PP e BNG, son “unhas agonías e uns aguafiestas” a quen “lles molesta que a cidade vaia ben”.

López Font arremeteu especialmente contra o portavoz nacionalista, Xabier Pérez Iglesias, a quen advertiu de que “non ten valor o que diga” porque “igual mañá xa non é portavoz”. Respecto diso, novamente lembrou os últimos resultados electorais: “temos 50 puntos máis que vostedes”.

CRÍTICAS DA OPOSICIÓN

Mentres, a concelleira do PP, Patricia García, cualificou como “sospeitoso” que o goberno local, unha vez máis, teña que “forzar unha modificación de crédito” para sufragar, entre outras cuestións, o encarecemento de varias obras na cidade. “Son vostedes os reis do sobrecusto”, proclamou.

Así mesmo, a edila ‘popular’ fixo fincapé na “nefasta xestión” que o goberno vigués fai do orzamento, cun elevado índice de inejecución de partidas, a pesar dos “anuncios e autobombo”.

Pola súa banda, o BNG presentou unha emenda parcial á proposta de modificación de crédito levada a pleno. Os nacionalistas propuxeron a mobilización doutros 25,4 millóns de euros “para atender ás necesidades reais” dos vigueses.

Segundo explicou o portavoz, Xabier Pérez Iglesias, na súa intervención, ese crédito adicional destinaríase a implementar un plan de investimentos en barrios e parroquias (12,5 millóns), a duplicar a partida do Plan de Emprego Municipal (con 1,2 millóns), a axudas sociais extraordinarias (6 millóns), a un plan municipal de aluguer (2,25 millóns), a financiar os billetes de bus a parados, persoas vulnerables e menores de 14 anos (un millón) e a “cumprir a promesa de Abel Caballero” de construír o chamado ‘Anel verde’ nos montes de Vigo.

A proposta do BNG foi rexeitada polo goberno, que a cualificou como “utópica e irreal” e afeou que os nacionalistas pretenden que Vigo “asuma competencias da Xunta”.

Finalmente, a modificación de crédito recibiu luz verde do pleno, co voto favorable da maioría socialista, a abstención dos edís do PP e o voto contrario do BNG.