O secretario xeral do PSdeG, José Ramón Gómez Besteiro, informou este sábado de que o grupo parlamentario socialista rexistrou unha batería de iniciativas en relación co “sobrecusto e outras irregularidades” na licitación do Hospital Álvaro Cunqueiro de Vigo e avanzou que enviará unha carta ao presidente da Xunta, Alfonso Rueda, na que lle demanda a súa comparecencia urxente no Pleno por este asunto.
Tras coñecerse o pasado mércores o Informe de Fiscalización do Contrato de Concesión do centro hospitalario vigués publicado por Contas, que conclúe que sería máis eficiente licitar a obra e os servizos do centro por separado, e non conxuntamente como levou a cabo a Xunta, xa que suporía un aforro de máis de 470 millóns de euros (IVE incluído), Besteiro volveu a sinalar que este documento confirma que o contrato foi “un desastre financeiro e administrativo” que causou “graves prexuízos” á cidadanía galega.
Así mesmo, en declaracións aos medios antes de asistir á Feira do Bonito de Burela, cualificou de “inaceptable” o sobrecusto, debido a “malas decisións” ás que se une unha “total falta de transparencia” no proceso de licitación. “Falamos de case 500 millóns de euros tirados ao lixo”, lamentou o líder do PSdeG, que remarcou que se trata de diñeiro “de todos os galegos” que foi “malgastado de maneira irresponsable”.
CARTA A RUEDA
Ademais das iniciativas rexistradas na Cámara galega, Besteiro avanzou que enviará unha carta ao presidente da Xunta, Alfonso Rueda, na que lle demanda a súa comparecencia urxente no pleno, así como a do conselleiro de Sanidade na comisión de Calidade Democrática e Transparencia.
Insistiu tamén en que Feijóo, presidente cando se licitaron as obras, e Rueda, como vicepresidente nese momento, “non poden seguir escondéndose” e deben dar explicacións sobre “o malgasto” de 470 millóns de euros. Neste sentido, afirmou que “non se pode xustificar o inxustificable”, en referencia ás declaracións realizadas este venres polo conselleiro de Sanidade.
Así, Besteiro defendeu que durante a pandemia o presidente do Goberno “tomou as decisións que había que tomar” e os profesionais sanitarios “deixáronse a pel”. Por iso, manifestou que dicir que “as obras combateron a covid é repetir o mantra de Ayuso co Zendal” e deixar claro que “para o PP, a sanidade é un negocio, neste caso, inmobiliario”.
