O BNG de Vigo criticou que o alcalde, Abel Caballero, nege “de forma cínica e irresponsable” o problema dos desafiuzamentos na cidade, indicando que no que vai de ano houbo de media un destes casos ao día. Nun comunicado, o portavoz nacionalista, Xabier Pérez Igrexas, alertou de que os alugueres subiron de media na urbe un 9 % no último ano. Por iso, preguntouse “canto máis teñen que subir os alugueres para que o alcalde, Abel Caballero, actúe”.
Así, interpelará ao goberno local na próxima xerencia municipal de urbanismo para coñecer os avances que deu o Concello para facer realidade as oito medidas recollidas na moción do BNG aprobada no último pleno, entre as que se atopa a declaración de zona tensionada.
“Que máis ten que pasar para que o Concello deixe de estar de brazos caídos e tome algunha medida diante do gravísimo problema da vivenda en Vigo? Cantos vigueses teñen que ser expulsdos da súa cidade por non poder permitirse o luxo de vivir en Vigo?”, criticou Igrexas. E engadiu outro problema que vive Vigo e son, ao seu xuízo, os desafiuzamentos, “a pesar de que esta realidade fose negada de forma cínica e irresponsable por parte de Abel Caballero”. No primeiro trimestre deste ano rexistráronse 91 casos, segundo as súas cifras. É dicir, un ao día de media.
