InicioPolíticaAbel Caballero celebrará un pleno extraordinario contra o "veto por ideoloxía" a...

Abel Caballero celebrará un pleno extraordinario contra o “veto por ideoloxía” a varias relatoras nun programa da Deputación

O BNG denuncia o "sectarismo" do goberno provincial e advirte de que non permitirá a volta "aos tempos tenebrosos do 'Louzanato'". Tamén lamenta que o goberno da Deputación reproduce "o mesmo 'modus operandi' que se aplica tamén na CRTVG".

PUBLICADO O

O alcalde de Vigo, Abel Caballero, anunciou este venres que a próxima semana convocará un pleno extraordinario para “rexeitar frontalmente” a “censura” que a Deputación de Pontevedra exerce con algunhas mulleres, participantes no programa ‘Aquí faltan páxinas‘. A través dunhas declaracións gravadas e remitidas aos medios, o rexedor olívico anunciou a convocatoria desa sesión plenaria, “atendendo a unha petición do BNG e do grupo socialista”, xusto despois de que o grupo municipal nacionalista anunciase que presentará unha moción urxente para o seu debate no pleno do luns, precisamente sobre esa decisión da Deputación, gobernada polo PP.

Abel Caballero lembrou que o programa ‘Aquí faltan páxinas’ foi posto en marcha pola institución provincial, “con Carmela Silva de presidenta” e criticou que “agora, a nova Deputación exclúe a varias relatoras” que formaban parte do programa polo seu apoio a candidaturas de partidos “diferentes ao PP”. O alcalde xustificou a convocatoria dun pleno extraordinario por considerar “de tal importancia” ese “veto”, que deixa fóra do programa a “mulleres extraordinarias, representantivas da cultura”, que “son vetadas pola súa ideoloxía política”.

DENUNCIA DO BNG

Precisamente este venres o grupo municipal do BNG comunicou o rexistro dunha moción urxente para o seu debate no próximo pleno, para denunciar a exclusión de catro relatoras, unha decisión adoptada o pasado martes e a pesar de que foran contactadas en decembro pola empresa que coordina a iniciativa para incorporalas á nova edición do programa.

Trátase da xornalista e activista pola memoria histórica, Montse Fajardo; a escritora e deputada do BNG, Mercedes Queixas; a profesora (e exedila do BNG en Pontevedra), Chus López Escudero; e a avogada e vicepresidenta da Mesa pola Normalización Lingüística, Elsa Quintas (que concorreu na candidatura do BNG nas municipais de Vigo). 

O grupo municipal nacionalista incidiu en que estas mulleres contan cunha “acreditada traxectoria” nos ámbitos do feminismo e a memoria, e “teñen como único denominador común participar ou apoiar publicamente ás candidaturas do BNG nas eleccións do 18F”. “Trátase, de maneira evidente, dunha represalia política, expresión do máis antidemocrático sectarismo”, denunciou o portavoz do BNG no Concello de Vigo, Xabier Pérez Igrexas, que lamentou que o goberno da Deputación reproduce “o mesmo ‘modus operandi’ que se aplica tamén na CRTVG”.

Tras denunciar as “políticas de demolición” do actual goberno provincial con respecto ás iniciativas que se fixeron no período 2015-2023 (cando a institución estivo gobernada por PSOE e BNG), Pérez Igrexas alertou dunha volta “aos anos máis escuros, marcados pola instrumentalización partidista e o caciquismo”. “Queremos que o Pleno do Concello de Vigo envíe unha mensaxe clara e rotunda ao PP: non imos permitir que a Deputación volva aos tempos tenebrosos do ‘Louzanato’, nin que a convertan no seu casarío”, proclamou o concelleiro.

ÚLTIMAS

Estudantes de Vigo e Monforte álzanse con tres premios da competición educativa Young Business Talents

Dous equipos de alumnado do IES San Tomé de Freixeiro (Vigo) e un grupo...

A concelleira do PP de Vigo Irene Garrido presenta a súa renuncia para centrarse na súa actividade no Congreso

A concelleira do PP de Vigo Irene Garrido presentou este venres a súa renuncia...

O BNG promete ser “a primeira liña de defensa” de Vigo no Parlamento galego, fronte ao “abandono” da Xunta

O BNG trasladou este venres o seu compromiso de ser "a primeira liña de...

O TSXG confirma a sentenza dun xulgado de Vigo que declaraba legal a prórroga do servizo municipal de auga

O Tribunal Superior de Xustiza de Galicia (TSXG) confirmou a sentenza ditada en 2022...