O concelleiro de Emprendemento da localidade pontevedresa de Ponteareas, Rafael Martínez, presentou este martes a súa dimisión ao non poder compatibilizar a súa vida persoal e laboral coas súas responsabilidades políticas. Nun comunicado, o Concello informou de que Martínez puxo fin á súa etapa no goberno de Nava Castro, por ser “incompatible” coa súa situación persoal e profesional.
“No día de hoxe presentei a miña renuncia como concelleiro de Emprendemento. Aínda que tiña ilusión por poder facelo, a miña situación persoal e profesional actual non me permite ter a dedicación necesaria para impulsar debidamente o emprendemento na nosa vila“, subliñou. Martínez puxo en valor esta “curta” pero “intensa” experiencia e agradeceu a Castro e a todo o equipo o trato e o respecto, así como aos veciños a confianza e o agarimo recibido. Precisamente a rexedora tamén destacou o labor de Martínez, desexándolle “o maior dos éxitos” na súa vida profesional e persoal. A concellaría vacante caerá en mans do seguinte edil da lista, Cristian Montes, técnico superior en actividades físicas e deportivas.
