Bolívar González, o que foi durante 17 anos concelleiro do Concello de Ponteareas polo BNG, denunciou ao actual membro da corporación municipal Domingos Freitas tras chamalo “parapléxico” no pleno de investidura da actual alcaldesa, Nava Castro, o pasado mes de xuño. Tal como relata González na súa denuncia, foi durante a sesión plenaria de constitución da nova corporación cando o denunciado dirixiuse “de forma pública no medio dunha disertación” cara ao denunciante, ordenándoo calar e cualificándoo de “parapléxico”.
Danse as circunstancias de que Bolívar González se viu obrigado a retirarse de toda actividade pública e laboral como consecuencia da deterioración de saúde que dificulta a súa mobilidade, precisando habitualmente de bastón ou apoios para camiñar. “Estes feitos eran sobradamente coñecidos polo denunciado, tal e como reflicte un ateigado policial do día dos feitos”, subliñou González nun escrito enviado aos medios de comunicación.
El critica que nos case tres meses desde ese suceso, non recibise unha desculpa ou unha mostra de arrepentimento por parte de Domingos Freitas, concelleiro de Independentes por Ponteareas que forma parte do goberno de Nava Castro (PP), ao ser o único edil non ‘popular’ que a votou para poder ser investida. González considera “totalmente intolerable” que se asignen postos de responsabilidade e non se castigue a unha persoa “que proferiu esas afirmacións desde unha praza pública”. Por iso, denunciouno como presunto autor dun delito de odio.
