O BNG cualificou como “prioritaria” a mellora das conexións ferroviarias de Vigo e a súa área metropolitana para favorecer o desenvolvemento socioeconómico da comarca, e tachou de “discriminación” a ausencia dunha rede de proximidade, xa que a área viguesa é “a única de España” que, coas súas características de poboación e actividade económica carece dese servizo.
Néstor Rego, deputado no Congreso, afirmou que “lamentablemente” Vigo está a perder o seu potencial pola crise industrial e mostrouse “preocupado” porque o alcalde, Abel Caballero, afirmase que “despois de Stellantis, a primeira industria de Vigo é o Nadal” (como trasladou nun programa de televisión local).
O deputado nacionalista lembrou que as comunicacións “son fundamentais” no desenvolvemento económico dunha área urbana, e advertiu de que tanto Goberno central, como Xunta e Concello de Vigo deberían ter “como prioridade común” o desenvolvemento das conexións ferroviarias entre a cidade e o resto de Galicia e España, e entre a cidade e Portugal. “Lamentablemente non é así”, constatou.
Rego advertiu de que o BNG seguirá reivindicando a conexión polo saída sur, que é “imprescindible” e criticou que a posición do Goberno, con atrasos e sen prazos concretos, fai pensar que as obras non estarán terminadas en 2020, prazo anunciado por Portugal para terminar a conexión no seu territorio.
PROXIMIDADES
Por outra banda, o deputado subliñou a necesidade de que se poña en marcha un tren de proximidade, e engadiu que a súa falta é “un exemplo da discriminación histórica de Galicia” nesta materia, xa que Vigo, “a primeira cidade de Galicia”, é a única coas súas características en España que non dispón de tren de proximidade, e criticou que PSOE e Unidas Podemos votasen en contra das emendas do BNG aos Orzamentos Xerais nas que se propuñan partidas para implementar este transporte.
Finalmente, Néstor Rego tamén se referiu a a necesidade de garantir as conexións de mercadorías, como a conexión do Porto coa Plataforma Loxística de Salvaterra-As Neves (Plisan).
CONEXIÓNS “ROTUNDAMENTE INSUFICIENTES”
Pola súa banda, o candidato á Alcaldía, Xabier Pérez Igrexas, subliñou que as conexións ferroviarias de Vigo son “rotundamente insuficientes” e “non están á altura” do que necesita unha área metropolitana como a viguesa.
Respecto diso, destacou que os servizos de media distancia están “superados pola demanda” e “a impuntualidade é a norma”; tamén denunciou a “negativa” do Goberno central a implantar as proximidades; e, con respecto ao AVE Vigo-Madrid, lembrou que “non chegou en 1993, como entón anunciou o ministro de Transportes, Abel Caballero”.
