O alcalde de Vigo, Abel Caballero, eludiu este mércores pronunciarse sobre se estaría a favor do indulto ao exfuncionario do Concello vigués condenado por enchufar a unha cuñada da actual concelleira e presidenta da Deputación de Pontevedra, Carmela Silva: “Non sei de que me fala“.

Todo iso despois de que o deputado do PP Diego Gago pedise no Congreso á ministra de Xustiza, Pilar Llop, que aclarase se o Goberno ten previsto conceder o indulto a Javier Gutiérrez Orúe, afiliado socialista en Vigo condenado por enchufar a unha cuñada de Silva.

En rolda de prensa, preguntado sobre este tema e se estaría de acordo co indulto, Abel Caballero limitouse a responder: “Non sei de que me fala”. Gutiérrez Orúe foi condenado a 5 anos e 3 meses de cárcere pola Audiencia Provincial de Pontevedra por favorecer a contratación da familiar de Silva, a través de varios contratos menores, nunha empresa que prestaba servizos para o Concello.