O grupo ecoloxista Luita Verde informou de que a Consellería de Medio Ambiente, Territorio e Vivenda da Xunta de Galicia abriu un expediente sancionador ao vertedoiro “incontrolado” de residuos situado no lugar do Casal, no concello de Moaña.
Así, tal como explicou este colectivo, esta sanción chega despois de que o vertedoiro fose denunciado en novembro do ano pasado ante a Comisión de Peticións do Parlamento Europeo.
Agora, a Valedora do Pobo informou os ecoloxistas de que Medio Ambiente sancionou o vertedoiro, aínda que Luita Verde lamentou que descoñece cal é a contía da multa, a pesar de ser “parte interesada” no expediente xa que foi o denunciante.
“A realidade é que, máis aló da suposta apertura do expediente sancionador por parte da Consellería, o departamento de servizos do Concello de Moaña segue vertendo incontroladamente residuos no lugar sen que a Consellería proceda a paralizar a actividade ilegal e contaminante“, criticaron desde Luita Verde.
