Unha mina ameaza unha das contornas naturais máis fermosas de Mondariz, o coto de Eira, un espazo con monte e especies autóctonas que corren serio risco. A explotación de granito ameaza elementos patrimoniais e naturais de gran valor nunha zona proposta na ampliación da Rede Natura 2000.
A veciñanza de Sabaxáns, en Mondariz, recorreu a resolución de aprobación da Xunta de Galicia para tentar paralizar o proxecto “Corvos” que afecta ao seu monte veciñal. A cuadrícula mineira linda co foxo do lobo das Estacas e invade a zona de protección dunha mámoa.
Asemblea do Suído denuncia nun comunicado que, ademais, da destrución e eliminación no lugar de hábitats e especies de interese europeo, e do impacto paisaxístico, o proxecto “Corvos” vai verter as augas das balsas de decantación ao espazo protexido do río Tea a través do seu afluente, o río Furafollas. “As augas do enxurro tamén afectan a outro río afluente do Tea, o Alén, cun alto valor ecolóxico e tamén proposto para formar parte da rede Natura 2000”, engade.
No ano 2010 a Asemblea do Suído, xunto con outros colectivos da zona, mobilizouse para paralizar outro proxecto dos mesmos promotores no mesmo lugar, mais no monte lindeiro veciñal das Estacas, conseguindo a súa desestimación administrativa. “Hoxe como antes, agardamos que este proxecto non se leve a cabo e que tanto a Xunta como os promotores, Granitos del Val SL, renuncien á súa consecución”, indica.
