O parque nacional marítimo-terrestre das Illas Atlánticas recibiu, entre os meses de xullo e agosto, máis de 245.000 visitas, un 16,6 % menos que no mesmo período do ano pasado, segundo avanzou este luns a conselleira de Medio Ambiente, Territorio e Vivenda, Ángeles Vázquez.

En declaracións aos medios antes de realizar unha visita ao arquipélago de Cíes, a conselleira sinalou que, tendo en conta as actuais circunstancias de pandemia, o comportamento do turismo nas illas foi “excelente”, xa que non se recibiron visitantes internacionais, e o turismo cinguiuse ao ámbito rexional e nacional.

Así, no que vai de ano, as Illas Atlánticas tiveron algo máis de 265.500 visitas, que se produciron no marco das cotas máximas previstos para cada arquipélago, e que non se modificaron no verán (1.800 visitantes diarios en Cíes e 1.300 en Ons, á marxe de campistas e grupos organizados).

Por outra banda, e preguntada polos medios acerca da posibilidade de ampliar esa tempada de visitas ás illas (a partir do 15 de setembro), a conselleira precisou que, en principio, non está prevista esa ampliación. No entanto, matizou que, a última semana da tempada, o comité técnico decidirá posibles medidas respecto diso.