O BNG de Vigo reclamou este mércores explicacións ao goberno municipal de Abel Caballero despois de que un novo episodio de contaminación microbiolóxica obrigase a restrinxir o baño na praia da Punta e nunha zona de Samil. A formación nacionalista considera insuficiente que o Concello relacione estes problemas coas precipitacións intensas rexistradas nas últimas horas e reclama medidas sobre o sistema de saneamento da cidade.

O voceiro municipal do BNG, Xabier Pérez Iglesias, asegurou que responsabilizar unicamente as choivas dos novos peches “é un insulto á intelixencia” e sostivo que os episodios rexistrados durante este mes de agosto evidencian, ao seu xuízo, problemas de fondo na infraestrutura.

Para Pérez Iglesias, o sucedido “é a evidencia dun fracaso estrutural” na xestión das augas residuais. O representante nacionalista criticou que, malia as actuacións desenvolvidas nas últimas décadas, continúen producíndose verteduras cara á ría cando aumenta de maneira significativa o volume de auga que chega á rede.

“Caen catro gotas e os colectores colapsan, vertendo augas sen depurar directamente ao mar”, afirmou o voceiro do BNG. A formación contrapón esta situación ao custo que asume a cidadanía polo servizo e lembra que os veciños de Vigo “pagan un dos recibos de saneamento máis caros de Galicia”.

Os nacionalistas enmarcan os peches da Punta e de parte de Samil nunha sucesión de incidencias rexistradas durante agosto. Segundo lembraron, outras praias viguesas xa tiveron restricións ao baño ao longo do mes por problemas relacionados coa calidade da auga.

A isto engaden o vertido de augas sen depurar detectado hai uns días no dique do Náutico, no centro da cidade. Para o BNG, estes episodios fan necesario determinar o estado da rede e localizar os puntos nos que se producen deficiencias cando aumentan as precipitacións ou o sistema recibe unha maior carga.

Pérez Iglesias tamén cargou contra o tratamento histórico das augas residuais na cidade e lamentou que, “despois de 30 anos”, se continúe tratando a ría “coma unha gran cloaca”.

Ante esta situación, o grupo municipal nacionalista solicitou a convocatoria urxente do Consello Sectorial de Medio Ambiente do Concello de Vigo, órgano no que pretende abordar os últimos episodios de contaminación e coñecer as actuacións previstas polo Executivo local.

PETICIÓN DUNHA AUDITORIA DA REDE DE SANEAMENTO

O BNG pide ademais ao goberno vigués que encargue unha auditoría de toda a rede municipal de saneamento. O obxectivo, segundo a formación, sería coñecer con detalle as condicións nas que se atopan colectores e demais infraestruturas e establecer as intervencións necesarias para reducir o risco de novas verteduras.

Os nacionalistas acusan o Executivo de Caballero de “inacción municipal” e reclámanlle que “dea a cara” ante os problemas rexistrados nas praias durante este verán.

A formación demanda que as conclusións desa revisión da rede se traduzan en actuacións concretas que eviten a repetición destes episodios, co propósito, en palabras de Pérez Iglesias, de “poñer fin dunha vez por todas a este vergoñoso espectáculo cada verán”.