A vicepresidenta segunda da Xunta e conselleira de Medio Ambiente, Ángeles Vázquez, pediu o alcalde de Vigo, Abel Caballero, que deixe de usar as Illas Cíes para “confrontar” e insistiu na importancia de “ir da man” para que o Parque Nacional das Illas Atlánticas sexa distinguido como Patrimonio da Humanidade pola Organización das Nacionais Unidas para a Educación, a Ciencia e a Cultura (Unesco).
Así o sinalou Vázquez ante os medios de comunicación durante a entrega do certificado de adhesión á Carta Europea de Turismo Sustentable ás empresas que operan no devandito parque. “O que temos que facer é aglutinar as catro illas e arquipélagos (Cíes, Ons, Sálvora e Cortegada), que veña o maior número de visitantes a Galicia e que eses visitantes traian o rumbo de turismo ambiental, de turismo de calidade e a partir de aí traballaremos para manter a excelencia”, reivindicou.
Por iso, pediu ao Concello de Vigo que “se poña ao lado da Xunta” porque todo o mundo “persegue o mesmo” que é “pór en valor a Galicia”. “Debemos de ir todos xuntos e loitar para que o parque sexa Patrimonio da Humanidade. Ímolo a conseguir”, sentenciou Vázquez, tras ser preguntada pola intención de Caballero de facer de Cíes Xeoparque Mundial. “Non sei se vai poder ser Xeoparque. Eu entendo que non reúne as condicións como tal, trátase dunha illa”, dixo a vicepresidenta segunda do Goberno autonómico.
