O presidente da Deputación de Pontevedra, Luís López, recibiu este martes no seu despacho á alcaldesa de Moaña, Leticia Santos, para asinar un convenio de colaboración enmarcado no Programa Provincial de Infraestruturas e Dotacións Singulares para a Execución da Axenda 2030 e dotado de forma global con 900.000 euros para financiar un proxecto para a rehabilitación das carpintarías de ribeira da Seara.

Segundo este convenio, a institución provincial destinará a este proxecto case 690.000 euros, o 75 % do orzamento, mentres que o concello achegará o 25% restante, uns 230.000 euros. O proxecto, valorado en preto de 920.000 euros, céntrase na rehabilitación integral das carpintarías de ribeira de Casqueiro e Carlagho e na súa integración na contorna da praza e o paseo que bordea a praia da Xunqueira, na zona da Seara.

A intervención inclúe o retranqueo das fachadas das carpintarías de ribeira para permitir a servidume de tránsito, a posta en valor das costas-varadero, a reconstrución da carpintaría de ribeira de Casqueiro, volvendo recuperar a súa estrutura de madeira; e a conservación e mellora da fachada e estrutura da carpintaría de ribeira de Carlagho.

O obxectivo deste proxecto baséase na recuperación destes dous estaleiros tradicionais que viviron o seu auxe a comezos do século XX para o seu uso cultural e museístico. Segundo o convenio, o proxecto deberá estar executado antes do 30 de abril de 2025.

RECINTO FEIRAL DE SILLEDA

Por outra banda, o presidente da Deputación de Pontevedra, Luís López, visitou este martes o Concello de Silleda para asinar co alcalde, Manuel Cuíña, un convenio de colaboración a través do cal o goberno provincial financiará con máis 760.000 euros, o 85% do orzamento, o proxecto a mellora da mobilidade peonil e rexeneración urbana da avenida Recinto Feiral e a rúa Arturo Pérez Lázara. O concello achegará os 134.000 euros restantes.