A Xunta e a Fundación Traslatio promoven visitas ao observatorio submarino ‘Nautilus’,instalado no Porto de Vigo, con talleres e actividades de divulgación que levan a cabo desde o pasado 16 de xuño e estenderanse ata o próximo 30 de setembro.
Segundo trasladou a Consellería, o titular de Mar, Alfonso Villares, visitou esta semana o ‘Nautilus’, instalado no porto vigués para dar a coñecer a fauna e flora mariña existente na zona.
Así, Villares destacou que a Xunta e a Fundación Traslatio colaboran para achegar o mar e promover o consumo de produtos pesqueiros entre a cidadanía, tanto mediante as visitas a esta instalación pioneira como nos distintos talleres que se realizan a bordo do buque de vapor ‘Hidria Segundo’.
Ademais, o conselleiro resaltou a importancia do Nautilus, que foi inaugurado en marzo, para que o conxunto da sociedade teña un “maior coñecemento sobre o medio mariño”.
O representante do Executivo galego explicou que a Consellería do Mar e a Fundación Traslatio buscan mobilizar ao maior número de persoas para que coñezan os ecosistemas mariños do porto, as distintas especies e prácticas pesqueiras a través tanto das visitas guiadas ao observatorio submarino como dos talleres a bordo do buque a vapor, xestionadas ambas as pola fundación.
Así mesmo, o Goberno galego resaltou que a colaboración entre as partes pretende mellorar o coñecemento xeral da sociedade sobre o mundo do mar e a comercialización das especies pesqueiras das rías galegas.
Con ese obxectivo, programáronse xornadas de divulgación desde o 16 de xuño ata o próximo 30 de setembro. As visitas guiadas ao ‘Nautilus’ duran media hora e pódense realizar de forma gratuíta en grupos de entre 20 e 25 persoas, un aforamento similar ao dos talleres formativos a bordo do ‘Hidria Segundo’, que está atracado no peirao da Laxe.
300 M2 DE SUPERFICIE
O observatorio Nautilus ten 19 metros de longo e nos seus 300 metros cadrados de superficie inclúen tres pantaláns e dúas ramplas de acceso desde a rúa.
O visor ábrese como unha xanela aos fondos mariños que recrean hábitats naturais e que contan con cámaras de gravación submarina que captan imaxes 24 horas ao día. Este corredor flotante permite aos visitantes observar a flora e a fauna, tanto intermareal como submarina, da contorna portuaria.
O ‘Hidria Segundo’, pola súa banda, é un barco de vapor restaurado de máis de 30 metros de eslora que se construíu entre os anos 1963 e 1966. Propiedade nos seus inicios da empresa Aljibes de Vigo, tiña como misión principal levar auga ás embarcacións que chegaban ao porto. Na actualidade, tras ser sometido a unha profunda restauración para mellorar o seu estado, opera como buque museo.
