A ONG animalista Fundación Franz Weber pediu este xoves que a Xunta de Galicia e o Concello de Mondariz se personen no “caso de sadismo animal” descuberto neste municipio, onde hai uns días apareceu un can morto nun colector, coa arteria femoral seccionada.
A organización advertiu sobre a “gravidade” deste acto, que provocou un “intenso sufrimento” ao animal antes de causarlle a morte, e puxo o foco no concepto de “violencia interrelacionada”, é dicir, no vínculo que os expertos establecen entre a violencia cara aos animais e a violencia interpersoal.
Ademais, segundo apuntou a xurista Anna Mulà, “son necesarias actitudes máis proactivas” e o Concello de Mondariz e a Xunta de Galicia “poden exercer ou personarse como acusación popular por este feito delituoso”.
Fundación Franz Weber instou ás autoridades locais e autonómicas a pór “os medios necesarios” para concienciar á cidadanía sobre a importancia de denunciar “cada caso de malos tratos animais”, e para fomentar o bo trato e a convivencia.
