A Xunta analizará a posibilidade de colaborar co Concello de Mos na execución dun novo proxecto de mellora da urbanización de San Rafael, na parroquia de Pereiras. Este foi un dos asuntos abordados entre a conselleira de Medio Ambiente, Territorio e Vivenda, Ángeles Vázquez, e a alcaldesa do municipio, Nidia Arévalo, nunha reunión mantida esta semana para falar de actuacións relacionadas co seu departamento.

En concreto, segundo informa a Xunta, a rexedora trasladou á conselleira que a actuación proxectada en San Rafael ten como fin a reforma integral desta zona, intervindo sobre a rede viaria interior, mellorando a relación e a accesibilidade entre os edificios e actuando co mesmo obxectivo sobre os espazos de uso público.

Ao respecto, Ángeles Vázquez indicoulle que o seu departamento estudará o proxecto municipal para avaliar a posibilidade de volver colaborar técnica ou economicamente co Concello.

Ademais, analizaron a marcha das obras de humanización na contorna parroquial de San Mamede, en execución desde comezos de xullo e que avanzan “a bo ritmo”, asegura a Xunta. Esta actuación parte dun convenio asinado en 2020 no marco do plan ‘Hurbe’, polo que a Consellería se compromete a financiar un 70 por cento e o Concello, o 30 por cento restante.