O delegado do Goberno en Galicia, Javier Losada, confirmou a existencia de protección policial á alcaldesa do Porriño (Pontevedra), Eva García da Torre, “acorde” aos feitos rexistrados no municipio.

En concreto, estableceuse esta protección tras a morte por arma branca dunha das mascotas da rexedora e polo clima de “conflitividade” neste municipio despois dun tiroteo a pasada fin de semana, no que resultaron feridos dous mozos de familias xitanas dos chamados Zamoranos por disparos nos que estaría involucrado algún membro do clan dos Morones.

Losada confirmou que falou este mércores coa alcaldesa, para informarlle que a Garda Civil iniciou unha investigación para tratar de atopar “os causantes deste acto”, engadiu.

Sobre o sucedido, a propia alcaldesa explicou que “apuñalaron vilmente” á súa mascota, unha cadela de 15 de anos de idade. “Se alguén quería facer unha advertencia ou amedrentarme, equivócase. Non vou dar nin un paso atrás”, advertiu a alcaldesa a pesar do ocorrido.