As actuacións das diferentes unidades da Garda Civil na provincia de Pontevedra, e principalmente do Servizo de Protección da Natureza (Seprona), durante o pasado ano deron lugar á detención/investigación de 78 persoas e investigaron máis de medio centenar de delitos contra o medio ambiente.

Segundo informou o Instituto Armado, no apartado de infraccións administrativas formuláronse case 1.800 denuncias. Destacou as infraccións á normativa sobre animais de compañía con 351 actuacións; as relativas a residuos sólidos e verteduras (317); as infraccións á normativa sobre montes (221); sobre sanidade animal e epizootias (151); e as actuacións relacionadas coa pesca (118).

Tamén a Benemérita fixo fincapé nas 98 denuncias formuladas por contravir a normativa sobre animais perigosos, 76 infraccións relacionadas coa normativa sobre augas, 63 por infrinxir as normas sobre urbanismo e ordenación do territorio, 59 relacionadas coa sanidade e medio ambiente e 32 por infraccións á lei de caza.

Os datos sobre infraccións penais do Instituto Armado sinalan un total de 67 delitos vinculados co medio ambiente, que foron esclarecidos na súa práctica totalidade (95,5%), co resultado de 78 persoas detidas ou investigadas.

Neste apartado destaca a Benemérita 41 delitos relativos á ordenación do territorio e á protección do patrimonio histórico e do medio ambiente, con dúas persoas detidas e 25 investigadas.

Deles, resaltan as mesmas fontes 28 delitos de malos tratos ou abandono de animais domésticos cun 64% de casos esclarecidos que deron lugar á detención ou investigación de nove persoas.

SEGURIDADE COLECTIVA

No ámbito dos delitos contra a seguridade colectiva rexistráronse sete delitos de incendios forestais con dúas persoas detidas e nove investigados. Ademais, investigáronse outros ilícitos vinculados a actuacións relacionadas co medio ambiente, 16 deles por defraudación de fluído eléctrico con catro persoas investigadas.

Así mesmo, en aplicación do convenio sobre o comercio internacional de especies ameazadas de fauna e flora silvestres (CITES), destaca a Benemérita a ‘Operación Hiposacro’ en Salvaterra do Miño.

INSPECCIÓNS

Noutra orde de actuacións, durante o pasado ano o Seprona formalizou 1.291 actas por inspeccións realizadas nos distintos ámbitos das súas competencias específicas.