A firma automobilística Fiat lanzou ao mercado a quinta xeración da Doblò e a súa versión eléctrica E-Doblò, que se fabricarán na planta viguesa de Stellantis, segundo informou a compañía nun comunicado.
O novo Doblò está dispoñible en dúas lonxitudes e tres configuracións diferentes (Van, Crew Cab e Combi). Ademais, incorpora ‘Magic Features’ entre as que se inclúe un aumento de carga de 0,5 metros cúbicos ou un espello retrovisor dixital de cinco polgadas, entre outros.
Esta versión ofrécese con dous motores diésel: un de 1.5 litros e 100 cabalos con transmisión manual e outro de 1.5 litros con 130 cabalos con transmisión manual e automática de oito velocidades. Ademais, tamén pode montar unha mecánica de 1.2 litros de gasolina de 110 cabalos.
A versión eléctrica está equipada cun propulsor eléctrico de 100 quilowatts (135 cabalos) e unha batería de 50 quilowatts-hora (kWh), con máis de 280 quilómetros de autonomía en ciclo WLTP. O ‘Quick Charge Mode’ de ata 100 quilowatts, permite cargar en corrente continua o 80% da batería en 30 minutos.
A introdución da batería non supón ningún cambio estrutural de vehículo, xa que está dispoñible nas mesmas dimensións, características e configuracións da versión Van que os seus homólogos de combustión.
Así mesmo co ‘Magic Plug’, dispoñible só en E-Doblò, é posible utilizar a enerxía eléctrica producida pola batería para necesidades de conversión específicas, como cargar a neveira de carga ou un banco de traballo para ferramentas eléctricas.
En España, xa se poden pedir nos puntos da Rede Fiat e a Rede Fiat Professional e parten de 229 euros ao mes cunha entrada de 2.225 euros para o Fiat Doblò Van e de 249 euros ao mes (entrada: 1.995 euros) para o Doblò Combi. O novo Fiat E-Doblò pódese adquirir no mercado español por 210 euros ao mes, cunha entrada de 11.600 euros que inclúe o plan Moves III (7.000 euros).
