Investigadores da Universidade de Vigo (UVigo) impulsaron unha aplicación dixital que ofrece información de carácter económico e financeiro sobre sociedades cooperativas galegas denominada Saves.
Os resultados deste proxecto, no marco do que a plataforma se puxo en funcionamento hai un ano, foron presentados este martes en Vigo. Así, abordáronse od catro informes que debían elaborarse durante o desenvolvemento da investigación, posta en marcha polos docentes da Facultade de Ciencias Económicas e Empresariais María José Cabaleiro e Carlos Iglesias.
O traballo concretouse no Asistente Virtual do Cooperativismo e a Economía Social, que permite consultar desde calquera dispositivo electrónico información sobre sociedades cooperativas galegas e que está dispoñible en inglés, galego e castelán.
Cabaleiro explicou que este traballo se desenvolveu en colaboración co movemento cooperativo e a administración e indicou que a información recollida na ferramenta obtívose na súa maior parte a través das contas anuais das cooperativas depositadas no rexistro oficial de Galicia.
A docente sinalou que a “dispersión” da información sobre economía social e cooperativismo motivou a posta en marcha da plataforma, que tamén foi desenvolvida ante a “falta” dun conxunto de indicadores adaptados á singularidade das sociedades cooperativas. Ademais, defendeu a importancia de dispor dunha “visión específica” na que “se sitúe ao socio, como persoa, no centro”, en lugar de “pola súa achega ao capital da empresa”.
