Os traballadores de Produtora Faro convocaron unha folga indefinida a partir deste mércores, 28 de abril, tras o anuncio da empresa do seu peche definitivo. Tal e como informa FESMC-UGT nun comunicado, o principal motivo da convocatoria de folga é que se comunicou ao persoal que non existe liquidez para pagar as nóminas deste mes e a falta de información sobre a gravidade do problema.
Produtora Faro ten un persoal de 42 traballadores, a metade dos cales son fixos descontinuos. O comité da empresa púxose en contacto coa dirección da produtora para interesarse pola situación que levou a tomar esta medida tan drástica. “A empresa alega que nos últimos anos era consciente de que arrastraba problemas económicos que podían derivar nun peche”, apuntan desde o sindicato.
Unha das medidas para tentar liquidar a crise financeira da firma foi a negociación de tres expedientes de regulación de emprego temporal (ERTES) cos traballadores desde o ano 2014.
TVG
Produtora Faro é unha empresa referente no sector audiovisual no sur de Galicia, con máis de trinta anos de historia, a maioría deles traballando para a Televisión de Galicia. De feito, ata o pasado 17 de abril gravouse nas súas instalacións viguesas o programa da canle pública galega “Que nos pille revolando”. De feito, nestes momentos nas instalacións da empresa está a realizarse un programa para TVG no que participan traballadores de Produtora Faro e doutra empresa.
Desde a súa creación realizou numerosos formatos para distintas canles de televisión, como series, documentais, películas de cinema, magacíns e programas de entretemento, sendo o seu principal cliente a Televisión de Galicia.
Viva o capitalismo! O capitalismo é a liberdade! Que importa morrer de fame se vivimos no capitalismo, na “democracia”