A planta do grupo Stellantis (antiga PSA Peugeot Citroën) volverá parar parte da súa produción debido aos problemas de subministración de compoñentes derivados da chamada crise dos microchips, segundo confirmaron fontes da factoría.
Así, a dirección da fábrica informou ao comité de que, “por problemas de aprovisionamento”, suspéndese a produción da quenda de noite do sistema 2 (o que monta as furgonetas) o vindeiro luns.
A planta de PSA tivo que suspender a súa produción en varias ocasións desde principios de ano polos problemas de subministración de compoñentes, cuxos fabricantes á súa vez están condicionados pola falta de semiconductores (microchips).
De feito, a quenda de noite dos dous sistemas de produción do pasado xoves xa non traballou, e tamén pararon as tres quendas do venres e o equipo da pasada fin de semana.
Ante este escenario, a empresa puxo en marcha os mecanismos de flexibilidade previstos (bolsa de horas e días de adecuación de xornada). No caso dos operarios que esgotasen estes mecanismos, aplicarase o ERTE pactado co comité (fóra de CIG e CUT), ao que se poden acoller os operarios fixos a tempo completo.
