AECT Río Miño advertiu de que a nova prórroga do peche da fronteira con Portugal supón “unha auténtica tomadura de pelo” e unha “ruína económica” para a zona. Así se pronunciou o vicedirector de AECT Río Miño, Uxío Benítez, tras aprobar o Parlamento luso unha nova prórroga do estado de emerxencia, que contempla o peche da fronteira con España, ata finais deste mes.

Benítez censurou que se prorrogou o peche da fronteira “agora que se están abrindo a economía e as restricións en todos lados” e alertou de que esta medida, “totalmente negativa”, supón “unha ruína económica para o territorio do río Miño” que foi “provocada por decisións políticas”.

“Estamos a ver que o mal xa está feito. Pasan os días prórroga tras prórroga e o único que fan os Estados, tanto os gobernos de Madrid como de Lisboa, é incrementar o dano que xa crearon“, reprobou. Deste xeito, Benítez asegurou que esta medida leva “quitar a metade da clientela a toda empresa e negocio que vive no territorio fronteirizo”, ademais da “problemática das persoas traballadoras para cruzar a fronteira”.

Tamén puxo o foco na “incoherencia” que representa que o peche da fronteira se adopte por motivos sanitarios debido a que nos controis establecidos só se comproban a identificación e as autorizacións administrativas.

Así as cousas, avanzou que AECT Río Miño intensificará nos próximos días as medidas para demandar compensacións económicas para o territorio do Miño mediante partidas específicas nos fondos europeos Next Generation, así como nos correspondentes ao período 2021-2027.

Neste sentido, a entidade incidiu en que distintos estudos mostraron que o peche das fronteiras causou un dobre impacto ao sumarse a afectación á situación transfronteiriza á crise sanitaria da covid-19.