A presidenta de Adif, Isabel Pardo de Vera, destacou este venres a “visión transformadora” que supuxo a construción da nova estación do AVE de Vigo e o centro Vialia deseñado por Thom Mayne, e lembrou que a estación ferroviaria estará terminada e “a disposición dos cidadáns” en setembro.
Así o trasladou durante unha visita ás obras da estación, na que estivo acompañada polo delegado do Goberno en Galicia, Javier Losada; a conselleira de Infraestruturas e Mobilidade da Xunta, Ethel Vázquez; o alcalde de Vigo, Abel Caballero; e a presidenta da Deputación de Pontevedra, Carmela Silva, entre outras autoridades.
Pardo de Vera celebrou que, na etapa final das obras, os traballos xa superaron unha “fase crítica” e a estación estará plenamente operativa en setembro. Para completar toda a contorna e os accesos haberá que esperar ata marzo ou abril do ano que vén.
A presidenta de Adif fixo fincapé na importancia deste “monumento” en termos de mobilidade e de “transformación” da cidade, e lembrou que a obra, que cualificou como “obra de arte”, tivo en conta parámetros de deseño e tecnoloxía para concibir espazos de luz, algo “moi difícil nunha estación ferroviaria”.
“SOÑO COLECTIVO”
Pola súa banda, a conselleira Ethel Vázquez constatou que a construción desta infraestrutura supón a culminación dun “soño colectivo” da cidade de Vigo, a pesar das “moitas dificultades e innumerables obstáculos”.
Respecto diso, lembrou que á complexidade dunha obra desta magnitude sumouse o problema da anulación do Plan Xeral de Vigo en 2015, de maneira que a execución dos traballos tivo que facerse ao amparo da lei 3/2016, concibida para posibilitar os proxectos de interese público eludindo as consecuencias da anulación do plan.
Así mesmo, destacou que o complexo intermodal de Urzáiz, no que tamén coopera a Xunta coa construción da estación de buses e o cofinanciamento dos accesos, é un exemplo de “colaboración institucional leal e construtiva”, e pediu que a estación do AVE “dobre o seu valor” coa execución da saída sur ferroviaria.
“DÍA DE CELEBRACIÓN”
Pola súa banda, o alcalde de Vigo, Abel Caballero, destacou que este venres é “un día de celebración” porque se constata que a gran obra da estación de Thom Mayne está na súa recta final, e proclamou que, cando o conxunto estea terminado, coa súa gran praza de 30.000 metros cadrados e outros espazos de goce cidadán, a terminal de Vigo será “unha das grandes estacións de AVE do mundo”.
O rexedor lembrou, no entanto, que cando chegou ao goberno local herdou un proxecto de entrada do AVE en superficie e o Goberno entón presidido por Zapatero accedeu a construír o túnel polo que se accede actualmente á estación. “Iso é o que nos permite que haxa saída sur, porque algúns ían imposibilitala para sempre”, sinalou.
