O proxecto ‘Seafeed’ concluíu coa presentación do “primeiro” sistema autónomo e intelixente para a alimentación de gaiolas acuícolas de pequeno e mediano tamaño tanto en mares como en lagos, instalado nunha plataforma flotante energéticamente eficiente.

A xornada de peche deste proxecto, que conta cun financiamento de máis de 600.000 euros, celebrouse este luns en Moaña, nun acto no que participou a directora da Axencia Galega de Innovación (Gain), Patricia Argerey.

Con este sistema optimizaranse os procesos de alimentación en acuicultura mariña a través da implementación dun modelo virtual de xestión intelixente; e posibilitarase a mellora continua dos procesos produtivos a través dun software de xestión adaptable a calquera tipo de instalación.

Detrás deste proxecto atópase un consorcio que, liderado por Feeding System, está conformado tamén polas empresas Quantum Innovative, Engranor e Montajes Cancelas, en colaboración cos grupos de investigación Cima e Ecimat da Universidade de Vigo.