O PP impulsará diversas iniciativas no Congreso, o Senado e o Concello de Vigo para reclamar a inclusión do polígono de Balaídos na planificación de Rede Eléctrica Española (REE) e a súa conexión á rede de ‘moi alta tensión’ (MAT), unha medida reclamada desde hai anos pola planta de PSA, e que lle serviría para mellorar a súa subministración enerxética e abaratar custos.
O portavoz do grupo municipal ‘popular’, Alfonso Marnotes, advertiu de que a exclusión dese polígono empresarial da rede de MAT “é un auténtico ataque ao corazón industrial de Galicia“, e lembrou que Vigo é a única gran cidade española que aínda non ten conexión á rede de 220 kw.
Marnotes lembrou que o alcalde anunciou en varias ocasións que o Goberno contemplaba esa conexión e constatou que “enganou e mentiu a todos”. “Non podemos consentir que o alcalde mire para outro lado, que aplauda os ataques do Goberno á cidade”, proclamou, e engadiu que o PP exporá unha “ofensiva” de iniciativas en todas as institucións para “esixir un posicionamento claro a favor da cidade” e para que a inclúa na planificación enerxética de Rede Eléctrica.
A deputada autonómica Teresa Egerique avanzou que o grupo popular rexistrou unha proposición non de lei para instar á Xunta a que demande a inclusión no plan plurianual 2021-2026 de Rede Eléctricade unha nova subestación en Balaídos para atender a demanda de PSA e do resto de empresas.
CONGRESO E SENADO
Pola súa banda, o deputado Diego Gago denunciou que este proxecto non só non aparece na planificación futura de Rede Eléctrica, senón que foi “eliminado” da anterior”. “Foi o PSOE unha vez máis o que eliminou un proyeto capital, e é un novo ataque a un sector clave”, criticou, e confirmou que o PP reclamará no Congreso que se recupere esa actuación.
Por último, a senadora Elena Muñoz lembrou que, aínda que o proxecto estaba na anterior planificación de Rede Eléctrica, era necesario que se declarase a condición de excepcionalidade (xa que Vigo non chega ao mínimo de demanda para ter conexión á rede MAT). “Pero dábannos longas”, afirmou, e explicou que o PP preguntará ao Goberno “por que excluíu esta infraestrutura”, que é “irrenunciable” para a cidade.
RESPOSTA DE ABEL CABALLERO
Pola súa banda, o alcalde da cidade, Abel Caballero, cuestionado polos medios acerca da exclusión de Vigo da planificación enerxética de REE, limitouse a afirmar que, “se PSA considera que é tan importante”, terano “á súa disposición” para facer o posible e conseguir esa conexión.
En todo caso, sinalou que ese proxecto “foi anunciado por Feijóo en 2013. “Como non o conseguiu? Gobernaba entón o PP, e non foi capaz de conseguir algo tan importante”, afirmou.
O rexedor anunciara hai dous anos que era inminente (“en meses”) a execución desa infraestrutura, e así o trasladou tras manter unha reunión co director da planta de PSA en Vigo. Naqueles momentos, a principios de 2019, Caballero xa mantivera contactos co Goberno de España para lograr ese proxecto.
En xullo dese ano, o Parlamento galego aprobou sen votos en contra unha proposición non de lei do PP para instar o Goberno a construír a nova subestación eléctrica de Balaídos, contemplada na planificación de REE do período 2015-2020.