InicioEconomíaA AECT Río Miño pide a reapertura "urxente" para os traballadoresde todos...

A AECT Río Miño pide a reapertura “urxente” para os traballadoresde todos os pasos fronteirizos con Portugal

Representantes de 18 concellos portugueses e galegos mostran o seu "total desacordo coa medida decretada polos gobernos de Portugal e de España".

PUBLICADO O

A Agrupación Europea de Cooperación Territorial do Río Miño (AECT Río Miño) pediu este martes que, “de maneira urxente, se reabran todos os pasos” fronteirizos para as persoas traballadoras, así como que estes teñan “un horario verdadeiramente adecuado ás necesidades dos traballadores e traballadoras”.

Así o comunicou a agrupación tras a reunión telemática que mantiveron este luns os responsables de 18 concellos portugueses e galegos, que mostraron “o seu total desacordo coa medida decretada polos Gobernos de Portugal e de España” de pechar pasos fronteirizos, a cal consideran que “revela unha total falta de coñecemento da realidade deste territorio“.

Tal e como lembrou a agrupación, en marzo de 2020 o único punto de paso autorizado era o de Tui-Valença, que “concentrou preto do 44 por cento do total da mobilidade de traballadores transfronteirizos”, ante o que “os gobernos reabriron as pontes de Cerveira-Tomiño, Monção-Salvaterra e Peso-Arbo”.

“A penas algúns meses despois, nun segundo momento de peche de fronteiras, é completamente incomprensible non ter en conta esta realidade, embarcándose nunha medida que potencia o ‘efecto embude’ que pode xerar un maior foco de contaxio”, denunciou a AECT, que pediu “polo menos” a reapertura das tres pontes, así como do posto fronteirizo entre Ponte da Barca e Ourense.

Neste contexto, o vicedirector do AECT e deputado provincial de Cooperación Transfronteiriza, Uxío Benítez, avanzou que, de non atenderse as súas peticións, emprenderán “mobilizacións”. “A indignación é xeneralizada e o consenso é absoluto para reivindicar a apertura de máis pasos fronteirizos para as persoas traballadoras”, selou.

DISPOSICIÓN A COLABORAR

Os gobernos dos municipios afectados tamén se puxeron a disposición para “colaborar no que sexa necesario para que a reapertura ocorra o máis rápido posible, evitando sobrecargar os traballadores transfronteirizos con máis custos e colocándoos en situacións de desgaste físico e psicolóxico”.

Neste sentido, Benítez insistiu en que os ao redor de 6.000 traballadores transfronteirizos “viven nunha situación de desgaste físico e psicolóxico debido ás filas interminables e aos rodeos, cun impacto no día a día persoal e profesional, non tendo o mesmo rendemento produtivo”.

Finalmente, a AECT Río Miño volveu reclamar aos Gobernos español e portugués a creación dun cartón de cidadán transfronteirizo, así como unha Intervención Territorial Integrada de carácter transfronteirizo para que as rexións fronteirizas “sexan compensadas por este segundo duro golpe socioeconómico”.

ÚLTIMAS

Estudantes de Vigo e Monforte álzanse con tres premios da competición educativa Young Business Talents

Dous equipos de alumnado do IES San Tomé de Freixeiro (Vigo) e un grupo...

A concelleira do PP de Vigo Irene Garrido presenta a súa renuncia para centrarse na súa actividade no Congreso

A concelleira do PP de Vigo Irene Garrido presentou este venres a súa renuncia...

O BNG promete ser “a primeira liña de defensa” de Vigo no Parlamento galego, fronte ao “abandono” da Xunta

O BNG trasladou este venres o seu compromiso de ser "a primeira liña de...

O TSXG confirma a sentenza dun xulgado de Vigo que declaraba legal a prórroga do servizo municipal de auga

O Tribunal Superior de Xustiza de Galicia (TSXG) confirmou a sentenza ditada en 2022...